విలక్షణ నటుడు కమల్ హాసన్ నటిస్తున్న తాజా చిత్రం ''ఉత్తమ విలన్''. ఈ చిత్రం విడుదలను అడ్డుకుంటూ నమోదైన పిటిషన్‌లను కోర్టు కొట్టి వేయడంతో అనుకున్న ప్రకారమే మే ఒకటో తేదిని ఉత్తమ విలన్ విడుదలవుతోంది. కాగా కమల్ హాసన్‌కు తమిళంతో పాటు తెలుగులోనూ భారీ మార్కెట్ ఉన్న విషయం తెలిసిందే. ఈ నేపథ్యంలో ''ఉత్తమ విలన్'' చిత్రాన్ని తెలుగులో ప్రముఖ నిర్మాత సి. కళ్యాణ్ భారీ ఎత్తున విడుదల చేయనున్నారు.
తాజా సమాచారం ప్రకారం 'ఉత్తమ విలన్' సినిమాకి తెలుగలో కమల్ హాసన్ స్వయంగా డబ్బింగ్ చెప్పుకున్నారంట. మామూలుగానే కమల్ సినిమాలకు ఎస్.పి.బాలసుబ్రమణ్యం లేదా మనోలు డబ్బింగ్ చెబుతుంటారు. అయితే ఈ చిత్రానికి కమల్ డబ్బింగ్ చెప్పడం విశేషంగా కనిపిస్తోంది. ఈ సినిమాలో కమల్ హాసన్ సరసన ఆండ్రియా, పూజ కుమార్‌ హీరోయిన్‌లుగా నటిస్తున్నారు.
