తెలంగాణ ప్రాంతానికి చెందిన కాంగ్రెస్ వృద్ధ నేత, కేంద్ర మాజీ మంత్రి జి వెంకటస్వామి (కాకా) పరిస్థితి విషమంగా ఉంది. ఈ విషయాన్ని హైదరాబాద్ కేర్ ఆస్పత్రి వైద్యులు వెల్లడించారు. కాగా ఆరోగ్య పరిస్థితిపై సోమవారం మధ్యాహ్నం కేర్ ఆసుపత్రి డాక్టర్లు హెల్త్ బులిటెన్ విడుదల చేశారు.
ప్రస్తుతం ఆయనను ఐసీయూలో ఉంచి వెంటిలేటర్‌పై చికిత్స అందిస్తున్నట్లు స్పష్టం చేశారు. ఎప్పటికప్పుడు నలుగురు వైద్యుల బృందం ఆయన ఆరోగ్య పరిస్థితిని సమీక్షిస్తున్నట్టు పేర్కొన్నారు.
గత కొంతకాలంగా కాకా అనారోగ్యంతో బాధపడుతూ, నగరంలోని కేర్ హాస్పిటల్లో చికిత్స పొందుతున్నారు. ఆదివారం రాత్రి ఆయన ఆరోగ్య పరిస్థితి విషమించడంతో వైద్యులు ఆసుపత్రిలోని ఇంటెన్సివ్ కేర్ విభాగానికి తరలించిన సంగతి తెలిసిందే.
