చాలాకాలం తర్వాత మాజీ మంత్రి సబితా ఇంద్రారెడ్డి సీన్లోకి వచ్చారు. వచ్చీ రావడం తెలంగాణ సీఎం కేసీఆర్‌పై విరుచుకుపడ్డారు. రంగారెడ్డి, హైదరాబాద్ జిల్లాలకు సాగు, తాగునీరు అందించడం కేసీఆర్కు ఇష్టం లేనట్టు ఉందని సబితా తెలిపారు. హైదరాబాదులో ఆమె మాట్లాడుతూ.. ప్రాణహిత-చేవెళ్లకు జాతీయ హోదా కావాలని డిమాండ్ చేసినప్పుడు కేసీఆర్కు ఈ ప్రాజెక్టు డిజైన్ సరికాదని తెలియదా? అని సూటిగా ప్రశ్నించారు.
చేవెళ్లలో జరిగిన బహిరంగ సభలో కేసీఆర్ ఏం మాట్లాడారో అందరికీ తెలుసునన్నారు. చేవెళ్లకు నీరందకుండా డిజైన్ మారిస్తే తీవ్ర పరిణామాలు ఎదుర్కోవాల్సి వస్తుందని తెలంగాణ ప్రభుత్వాన్ని సబిత హెచ్చరించారు. ప్రాణహిత-చేవెళ్ల ప్రాజెక్టు డిజైన్ మార్పును ప్రజలు అంగీకరించట్లేదని, ఒకవేళ ప్లాన్ మార్చాలనుకున్నా.. కాంగ్రెస్ పార్టీకి పేరొస్తుందని కేసీఆర్ భావిస్తున్నట్లు సబిత దుయ్యబట్టారు. పార్టీలకు మార్కులు ప్రధానం కాదని, ప్రభుత్వాలు ప్రజా ప్రయోజనాలు పరిరక్షించాలని సబితమ్మ కేసీఆర్కు సూచించారు.
