కాంగ్రెస్ పార్టీకి తెలంగాణలో నూకలు చెల్లిపోతున్నాయా.. అంటే అవుననే అనుకోవాల్సి వస్తుంది. నిన్న గ్రేటర్ ఫలితాలు అలా ప్రకటించారో లేదో తెల్లారేసరికి గ్రేటర్ హైదరాబాద్ కాంగ్రెస్ అధ్యక్ష పదవికి దానం నాగేందర్ రాజీనామా చేసేశారు. కాంగ్రెస్ పార్టీ గ్రేటర్ హైదరాబాదు పరిధిలో ఎన్నడూ చవిచూడని పరాభవాన్ని చవిచూసింది. గులాబీ పార్టీ షాకుతో హస్తం గల్లంతైంది. దీనితో ఓటమికి బాధ్యతగా తను రాజీనామా చేస్తున్నట్లు దానం ప్రకటించారు.
గ్రేటర్ ఎన్నికల్లో గెలిచిన కార్పోరేటర్లందరికీ పేరుపేరునా ధన్యవాదాలు తెలియజేస్తున్నానని చెప్పారు. ఈ ఎన్నికల్లో తాము ఆశించిన ఫలితాలు రాలేదన్న దానం టీఆర్ఎస్ హామీలకు ప్రజలు ఆకర్షితులయ్యారని వెల్లడించారు. తనకు గ్రేటర్ ఎన్నికల సమయంలో పూర్తి బాధ్యతలు ఇవ్వకపోయినా కష్టపడి పనిచేశానంటూ చెప్పుకొచ్చారు. మొత్తమ్మీద గ్రేటర్ ఎన్నికల ఫలితాల తర్వాత తొలి వికెట్ కాంగ్రెస్ పార్టీ నుంచి పడింది. మరి ఇంకెంతమంది రాజీనామాల బాట పడతారో చూడాలి.
