తెలంగాణా రాష్ట్రంలోని అదిలాబాద్‌లో అసిస్టెంట్ డ్రగ్ కంట్రోలర్‌గా పని చేస్తున్న ఓ అధికారి హైదరాబాద్‌లో కోట్లాది రూపాయల విలువ చేసే ఆస్తులు సంపాదించాడు. హైదరబాద్‌లో ఏకంగా ఓ షాపింగ్ కాంప్లెక్స్‌కు ఓనర్‌గా మారాడు. ఈ అధికారి అక్రమార్జనపై అవినీతి నిరోధక విభాగం అధికారులు తవ్వే కొద్దీ కొత్త కొత్త విషయాలు వెలుగులోకి వస్తున్నాయి.
ఈ వివరాలను పరిశీలిస్తే తెలంగాణ రాష్ట్ర ఔషధ తనిఖీ, నియంత్రణ మండలిలో అసిస్టెంట్ డ్రగ్ కంట్రోలర్‌గా గోపాల్ రావు అనే వ్యక్తి పని చేస్తున్నారు. ఆదిలాబాద్ జిల్లాలో పనిచేస్తున్న గోపాల్.. భారీ ఎత్తున లంచాలు స్వీకరిస్తున్నారన్న ఫిర్యాదులతో ఏసీబీ అధికారులు రంగంలోకి దిగారు. అదిలాబాద్, మలక్‌పేట, నేరేడ్‌మెట్ ప్రాంతాల్లో ఉన్న ఆయన నివాసాల్లో ఏకకాలంలో సోదాలు నిర్వహించారు.
దాడుల్లో భాగంగా గోపాల్ పెద్ద ఎత్తున అక్రమాస్తులను పోగేశారని తేలింది. హైదరాబాదులోని దిల్‌సుఖ్ నగర్ ప్రాంతంలో ఏకంగా షాపింగ్ కాంప్లెక్స్‌లను గోపాల్ కలిగి ఉన్నట్టు గుర్తించారు. అలాగే, మలక్ పేట, చిక్కడపల్లిలో ఐదు, రెండు అతస్తుల భవనాలు, మల్కాజ్‌గిరిలో ఆరు ఫ్లాట్లు ఉన్నట్టు కనుగొన్నారు. ఇంకా కొనసాగుతున్న తనిఖీల్లో మరిన్ని అక్రమాస్తులు వెలుగు చూసే అవకాశాలున్నాయని ఏసీబీ అధికారులు చెబుతున్నారు.
