నా పడక గదిలో రాత్రి పూట ఏం జరుగుతుందో మీకు చెప్పాలా అంటూ భారత టెన్నిస్ స్టార్, తెలంగాణ రాష్ట్ర బ్రాండ్ అంబాసిడర్ సానియా మీర్జా ప్రశ్నించారు. బీబీసీ చానెల్‌కు ఆమె ప్రత్యేక ఇంటర్వ్యూ ఇచ్చారు. ఇందులో ఆమెకు ఆ చానెల్ ప్రతినిధి నుంచి ఓ వింతైన ప్రశ్న ఎదురైంది. దీనికి సానియా మీర్జా ఆగ్రహం వ్యక్తం చేసింది.
వివాహమై ఐదేళ్లు దాటిపోతున్నా, పిల్లలు లేరుగా? అనే ప్రశ్న బీబీసీ ప్రతినిధి సంధించారు. దీనిపై సానియా మీర్జా ఘాటుగానే స్పందించారు. 'నా బెడ్ రూంలో ఏం జరుగుతుందో అడిగే హక్కు ఎవరికీ లేదు' అంటూ ఆమె బీబీసీ ప్రజెంటర్ కు ఘాటుగా సమాధానం చెప్పారు.
కాగా, 2010లో పాకిస్థాన్ క్రికెటర్ షోయబ్ మాలిక్‌తో సానియా పెళ్లి జరిగిన విషయం తెలిసిందే. పెళ్లి తర్వాత సానియాతో పాటు షోయబ్ కూడా క్రీడా జీవితంలో బిజీబిజీగానే ఉన్నారు. ఈ క్రమంలో తల్లి ఎప్పుడు అవుతారంటూ సానియాకు పలు సందర్భాల్లో ప్రశ్నలు ఎదురయ్యాయి. ఈ తరహా ప్రశ్నలపై మొన్నటిదాకా కాస్తంత సావధానంగానే సమాధానాలు చెప్పిన సానియా తాజాగా ఆగ్రహావేశాలతో ఊగిపోయారు.
