దేశ రాజధాని నగరం ఆతిథ్యమిస్తోన్న ప్రతిష్టాత్మక కామన్వెల్త్ గేమ్స్‌లో భారత అథ్లెట్లు పతకాలు సాధిస్తారా? అని ప్రపంచ చెస్ ఛాంపియన్ విశ్వనాథన్ ఆనంద్ ఆందోళన వ్యక్తం చేశాడు. కామన్వెల్త్ గేమ్స్‌ను వెంటాడుతున్న అవినీతి ఆరోపణల నేపథ్యంలో, అక్టోబర్ 3నుంచి ప్రారంభం కానున్న ఈ క్రీడల్లో మన దేశ క్రీడాకారులు ఎన్ని పతకాలు సాధించగలరనే దానిపట్ల ఆనంద్ అసంతృప్తి వ్యక్తం చేశాడు.
‘క్రీడల నిర్వహణకు ఏర్పాట్ల గురించిన వివరాలు నాకు తెలియదు. ఎన్ని పతకాలు మనం సాధించగలమనేదే నా ఆందోళన. ఈ ఢిల్లీ గేమ్స్‌లో మన అథ్లెట్లు పతకాలు సాధిస్తారని నా విశ్వాసం’ అని ఆనంద్ చెప్పాడు. ఆనంద్ తన పౌరసత్వంపై చోటు చేసుకున్న వివాదాన్ని గత చరిత్రగా కొట్టిపారేశాడు. అతి త్వరలో తనకు గౌరవ డాక్టరేట్‌ను బహూకరిస్తారని పేర్కొన్నారు.
