భూమిలో మంచీ, చెడు విత్తనాల వలె మానవ హృదయాలలో పుణ్యపాప సంబంధ సంస్కార బీజాలు ఉంటాయి. బ్రహ్మజ్ఞాన పరిశోధన వల్లనే కోట్లాదిజీవులు తరించాలి. వేరే మార్గం లేదు. అంటే ఎండాకాలమున భూమిలో తృణబీజములు కనిపించకపోయినా, వానపడేటప్పుడు ఎలా అంకురిస్తాయో, ఏఏ బీజములుంటాయో, అవి అలాగే మొలకెత్తి వృక్షాలై కాయలుకాచి పండ్లనిస్తాయి.
భూమిలో లేని బీజమొక్కటీ మొలవదు. అలాగే హృదయం నుంచి పుణ్యంగాని, పాపంగాని- ఏ గుణం కలుగుతుందో, తదనుగుణమైన సంస్కారం తనలో ఉన్నట్లు తెలుసుకోవాలి. విత్తనం లేని భూమిలో ఏ చెట్లుగాని, తృణముగాని పుట్టినట్లు సంస్కారం నశించిన హృదయంలో ఏ గుణమూ కలుగదు ఇదే దాని గుర్తు.
నిప్పులో వేయించిన విత్తనాలు ఏవిధంగా అంకురించవో, అలాగే జ్ఞానాగ్నిలో దగ్ధమైన సంస్కారము కలుగనప్పుడు ప్రాకృత గుణములేవీ ఉద్భవించవు. ఇదే దీనిలో గల రహస్యం. అటువంటి స్థితి బ్రహ్మ జ్ఞానం వలనే కలుగుతుంది. ఎందుకంటే బ్రహ్మము ప్రకృతి రహితమైనది. శుద్ధమైనది. జ్ఞానమైనది. దాని నుంచి ప్రాకృత గుణాలు జనింపవు.
