సీతమ్మ పాదాలు కనిపించే దివ్య క్షేత్రమే అనంతపురం జిల్లాకి చెందిన 'లేపాక్షి'. అనేక విశేషాలను ఆవిష్కరించే ఆధ్యాత్మిక కేంద్రంగా లేపాక్షి అలరారుతోంది. అలాంటి లేపాక్షి క్షేత్రంలో ఒకచోట సీతమ్మవారిదిగా చెప్పబడుతోన్న పాదముద్ర కనిపిస్తుంది.
ఇలాంటి పాదముద్రలు చాలా క్షేత్రాల్లో కనిపిస్తుంటాయి. అయితే ఈ పాదముద్ర యొక్క బొటనవ్రేలు భాగం నుంచి నిరంతరం సన్నని నీటిధార వస్తుండటం విశేషం. మండువేసవిలో సైతం ఈ నీటిధార ఆగకపోవడం ఆశ్చర్యాన్ని కలిగించకమానదు.
సీతమ్మవారి పాదముద్రను తాకితే ఆ తల్లి ఆశీస్సులు లభించినట్లు భక్తులు భావిస్తుంటారు. ఆ నీటిని స్పర్శించినా, తలపై చల్లుకున్నా, తీర్థంగా స్వీకరించినా పాపాలు హరించిపోతాయని భక్తులు విశ్వసిస్తుంటారు.
రాముడి వెంట వనవాసానికి బయలుదేరిన సీతమ్మ ఎన్నో ప్రాంతలమీదుగా ప్రయాణాన్ని కొనసాగించడం జరిగింది. ఆ తల్లి పాదస్పర్శచే ఈ నేల పునీతమైంది. అలాంటి సీతమ్మవారి పాదముద్రను పదిలంగా తన గుండెల్లో దాచుకుని, దర్శించిన భక్తులను ధన్యులను చేస్తోన్న ఈ మహిమాన్వితమైన క్షేత్రాన్ని చూసితీరవలసిందే.
