కర్కాటక రాశిలో జన్మించిన స్త్రీ, పురుష జాతకులు అపారమైన మేధాశక్తిని కలిగి ఉంటారని జ్యోతిష్కులు పేర్కొంటున్నారు. వీరిలో కర్కాటక రాశికి చెందిన పురుషులు బాధ్యతాయుతమైన ప్రవర్తనను కలిగి ఉంటారు. పట్టుదల, కృషి చేసేవారుగాను ప్రకృతి ఆరాధకులుగాను ఉంటారు. సంబంధ, బాంధవ్యాలను ఎట్టి పరిస్థితుల్లోనూ వదులుకోని వారుగా ఉంటారు.
సంగీత ప్రేమికులుగా ఉండడం వల్ల వీరు చాలా ప్రశాంతంగా ఉంటారు. సత్యాన్ని తెలుసుకొని తదనుగుణంగా తమ సంబంధాలు కొనసాగిస్తారు. వారికి అప్పగించిన పనులకు పూర్తి న్యాయం చేస్తారు. ప్రపంచమంతా ఒకే కుటుంబం అని భావించే మనస్తత్వాన్ని కలిగి ఉంటారు.
సమస్యలను ధైర్యంగా ఎదుర్కొనేవారుగానూ, అనుకున్నది సాధించేవరకూ విశ్రమించనివారుగానూ ఉంటారు. వీరి స్ధిరత్వం లేని మనస్తత్వం వల్ల వీరి చుట్టుపక్కలవారు కాస్తంత తికమక పడక తప్పదు. తమకు నచ్చిన పద్ధతిలో వారి ఇష్టప్రకారం నడుచుకుంటారు. వీరు అపారమైన మేధస్సును కలిగి ఉంటారు కనుక అందరికీ వీరు మార్గదర్శకులుగా ఉంటారు.
కర్కాటక రాశిలో జన్మించిన మహిళలు కుటుంబ బాధ్యతలను నిర్వహించటం తోటిదే లోకంగా ఉంటారు. అంతేకాదు కుటుంబంలో ఎవరికి ఏ చిన్న కష్టం వచ్చినా వారకి రక్షణగా నిలుస్తారు. శ్రమశీలిగాను, ఆత్మవిశ్వాసం కలవారుగాను మిత వ్యయకారిగానూ ఉంటారు. కళలను ఆరాధించగల స్వభావాన్ని కర్కాటకరాశి స్త్రీలలో చూడవచ్చు. సంబంధ బాంధవ్యాలను పటిష్టపరచుకోవటం ద్వారా అందరికీ అత్యంత సన్నిహితులుగా మెలగుతారు.
