ప్యాంటు వేసుకున్నందుకు జైలు పాలయిన జర్నలిస్ట్..!
మహిళలు ప్యాంటు తొడుక్కోవటం సూడాన్ షరియా చట్టం ప్రకారం నేరం అన్న విషయాన్ని మరచిన ఆ దేశ మహిళా జర్నలిస్ట్ ఒకరు ప్యాంటు ధరించినందుకుగానూ జైలుశిక్షకు గురయ్యారు. ప్యాంటు ధరించిన నేరానికి పాల్పడిన లాబ్నా అహ్మద్ అల్ హుసేనీకి అనే మహిళకు సూడాన్ రాజధాని ఖార్తూమ్‌లోని ఓ కోర్టు సోమవారంనాడు కొరడా దెబ్బలకు బదులు 200 డాలర్ల జరిమానాను శిక్షగా విధించింది.ఒకవేళ హుసేనీ జరిమానా కట్టలేని పక్షంలో నెల రోజులపాటు జైలుశిక్షను అనుభవించాలని న్యాయస్థానం ఆదేశించింది. అయితే ఆమె జరిమానా చెల్లించేందుకు నిరాకరించారు. జరిమానా కట్టనని, జైలుకే వెళ్తానని ఆ మహిళా జర్నలిస్ట్ పట్టుబట్టడంతో తప్పనిసరి పరిస్థితుల్లో ఆమెను జైలుకు తరలించారు.ఇదిలా ఉంటే... రెండు నెలల క్రితం ప్యాంటు ధరించిన హుసేనీ ఖార్తూమ్‌లోని ఓ రెస్టారెంట్‌లో తన మిత్రులతో కలిసి ఉండగా పోలీసులు అరెస్టు చేశారు. కాగా... సూడాన్ షరియా చట్టాల ప్రకారం మహిళలు ప్యాంటు ధరించడం నిషిద్ధం. అయితే ఆమె కోర్టుకు హాజరవుతూ కూడా ప్యాంటు ధరించి రావటం ఆమె ధిక్కార స్వరానికి నిదర్శనంగా చెప్పుకోవచ్చు.
