కేంద్ర ఆరోగ్యశాఖామంత్రి హర్ష వర్ధన్ మరోమారు వివాదాస్పద వ్యాఖ్యలు చేశారు. మహిళ శరీరం ఓ దేవాలయమంటూ వ్యాఖ్యలు చేసి పెను దుమారం రేపారు. మొన్నటికి మొన్న అత్యాచారం చాలా చిన్నదంటూ వ్యాఖ్యానించి వివాదంలో చిక్కుకున్న విషయం తెల్సిందే. ఈ విషయం చల్లారిందని భావించేంతలోనే ఆయన తాజాగా మహిళ శరీరంపై వివాదాస్పద వ్యాఖ్యలు చేశారు.
ఢిల్లీలోని ఓ మహిళా కళాశాల స్వర్ణోత్సవ వేడుకల్లో ఆయన పాల్గొని మాట్లాడుతూ.. 'మహిళ శరీరం దేవాలయం లాంటిది. ఒక కొత్తతరాన్ని రూపొందించాలంటే ఆరోగ్యవంతులైన మహిళలు అవసరం. వాళ్లే అనారోగ్యం బారిన పడితే ఆ ప్రభావం కుటుంబం మీద, సమాజం మీద, జాతిమీద కూడా పడుతుంది' అంటూ ఆయన సెలవిచ్చారు.
పట్టణ యువతుల్లో ఇటీవలి అనారోగ్యాలు ప్రబలిపోతున్నాయని చెప్పేందుకు మహిళ శరీరాన్ని ఇలా వర్ణించారు మన ఆరోగ్య మంత్రివర్యులు. దీనిపై ట్విట్టర్ లో పెను దుమారమే రేగింది. యూజర్లు దీనిపై నిప్పులు చెరిగారు. కేంద్ర వైద్య ఆరోగ్యశాఖ మంత్రి తన భాషను సంస్కరించుకోవాలంటూ హితవు పలుకుతున్నారు.
