బెంగుళూరు రైల్వే స్టేషన్ సమీపంలో బుధవారం అర్ధరాత్రి పెట్రోలింగ్ చేస్తున్న పోలీసులు అటుగా డగడగమంటూ కర్ణకఠోర శబ్దం చేసుకుంటూ వెళుతున్న ఓ డొక్కు ఆటోని ఆపారు. ఆ డొక్కు ఆటోని ఆసాంతం తనిఖీ చేసిన పోలీసులకు కళ్లు మిరుమిట్లు గొలిపే ఆశ్చర్యం కనబడటంతో నోళ్ళు వెళ్లబెట్టారు. దీనికి కారణం ఏంటయా అంటే, ఆ డొక్కు ఆటోలో ఏకంగా మూడు కిలోల బంగారు బిస్కెట్లు గలగలలాడుతూ కనిపించాయి మరి. బెంగళూరు నుంచి తమిళనాడులోని కోయంబత్తూరుకు బిస్కట్ల రూపంలో ఉన్న ఈ బంగారాన్ని చేరవేస్తున్నట్లు తేలింది.
ఆటోలో తీసుకువెళుతున్న మూడు కిలోల బంగారు బిస్కట్లతోపాటు 42 లక్షల రూపాయలను కూడా బెంగళూరు గ్రేహౌండ్స్ పోలీసులు స్వాధీనం చేసుకున్నారు. ఆటోలో ప్రయాణిస్తున్న కోయంబత్తూరుకు చెందిన నటరాజ్, బాల, రాంకుమార్ ల వద్ద ఉన్న సూట్‌కేసుల్లో ఇవి లభ్యమైనట్లు పోలీసులు కనుగొన్నారు. ఐతే ఈ బంగారు బిస్కట్లు, డబ్బుకు సంబంధించి ఎలాంటి ధ్రువీకరణ పత్రాలు లేకపోవడంతో వారిపై కేసు నమోదు చేసిన పోలీసులు దర్యాప్తు చేస్తున్నారు.
