బీహార్ రాష్ట్రంలో విచిత్రమైన ఘటనలు చోటు చేసుకుంటున్నాయి. తాజాగా, ఓ మాజీ సైనికోద్యోగి మీసాలు తీయలేదన్న కోపంతో ఆయన చెవులను ఇద్దరు సోదరులు కత్తిరించారు. బీహార్ రాష్ట్రంలోని కౌదియా గ్రామ వాసి రామానుజ్ వర్మ మిలిటరీలో పనిచేసి పదవీ విరమణ పొందాడు. మరో ఉద్యోగం చేస్తూ కుటుంబాన్ని పోషించుకుంటున్నాడు.
ఓరోజు విధుల నుంచి తిరిగివస్తుండగా, మార్గమధ్యంలో లాల్కూ యాదవ్, బీనా యాదవ్ అనే ఇద్దరు సోదరులు రామానుజ్‌ను అటకాయించారు. మీసం తీసేయాలని హుకుం జారీ చేశారు. మరోసారి మీసంతో కనిపిస్తే తామే ఆ పనిచేయాల్సి ఉంటుందని హెచ్చరించారు. అయితే, రామానుజ్ వారి బెదిరింపులను పట్టించుకోలేదు.
దీంతో, ఆ సోదరులు తమ మిత్రులను పిలిచి మాజీ సైనికుడిపై దాడికి దిగారు. బీనా యాదవ్ కత్తితో రెండు చెవులు కోసేశాడు. అనంతరం రామానుజ్ బైక్‌తో సహా వారందరూ అక్కడి నుంచి పరారయ్యారు. దీనిపై ఫిర్యాదు అందుకున్న పోలీసులు దర్యాప్తు ప్రారంభించారు.
