సోషల్ మీడియా పుణ్యమా అంటూ యువతకు సెల్ఫీల పిచ్చి ముదిరిపోయింది. సామాజిక మాధ్యమాల్లో పోస్ట్ చేసే సెల్ఫీలు మానవతా విలువల్ని పోగొట్టేలా ఉన్నాయి. ఇది కూడా అటువంటిదే. సౌదీ అరేబియాకు చెందిన ఓ నెట్ ప్రియుడు తన తాత మృతదేహం తీసిన సెల్ఫీ ఫోటోను నెట్‌లో పెట్టాడు. మృతి చెందిన తాతయ్య మృత దేహం వద్ద నాలుక బయటపెట్టి వెక్కిరిస్తూ, సెల్ఫీ తీసుకున్నాడు. ఈ జుగుప్సాకరమైన ఫోటోను తన సోషల్ మీడియాలో పోస్టు చేశాడు.
అయితే ఈ ఫోటోపై నెటిజన్స్ ఫైర్ అవుతున్నారు. శుభాలకు, అశుభాలకు తేడా లేకుండా.. మానవతా విలువల్ని మంటగలిపేలా ఇలాంటి సెల్ఫీలు తీయడం ఏంటని మండిపడుతున్నారు. ఈ సెల్ఫీ పక్కన 'గుడ్ బై గ్రాండ్ ఫాదర్' అని ట్యాగ్ కూడా పెట్టాడు. ఈ ఘటనపై సౌదీ అధికారులు విచారణకు ఆదేశాలు జారీ చేశారు. దీంతో అయ్యగారికి జైలు ఖాయమని వార్తలు వస్తున్నాయి.
