వాతావరణ కాలుష్యాన్ని గుర్తించేందుకు గూగుల్ రంగంలోకి దిగింది. స్ట్రీట్ వ్యూ కార్లను రంగంలోకి దింపింది. వాటికి కొన్ని రకాల సెన్సార్లను ఏర్పాటు చేస్తున్నారు. దీని ద్వారా ఏ సిటీలో ఏ వీధిలో ఎంత కాలుష్యం ఉందో కూడా నేరుగానే తెలుసుకునే అవకాశం ఉంటుంది.
గత ఏడాది నుంచి స్టార్టప్‌ అక్లిమా సంస్థతో కలిసి ఈ విషయంపై పని చేస్తున్నట్లు గూగుల్ ప్రకటించింది.
అమెరికాలోని డెన్వర్‌ , కొలరాడో నగరాల్లో తిరిగిన గూగుల్ స్ట్రీట్‌వ్యూ కార్లు వాతావరణంలో గాలి నాణ్యతకు సంబంధించి 150 మిలియన్‌ పాయింట్ల సమాచారాన్ని ఇప్పటికే రికార్డు చేశాయి. వీటిలో వూపిరితిత్తులు, శ్వాసకు హానిచేసే నైట్రోజన్‌ డై ఆక్సైడ్‌, నైట్రిక్‌ ఆక్సైడ్‌, ఓజోన్‌, కార్బన్‌ మోనాక్సైడ్‌, కార్బన్‌ డై ఆక్సైడ్‌, మీథేన్‌, బ్లాక్‌ కార్బన్‌ తదితర కారకాలు ఉన్నట్లు తెలిపింది.
నగరాల్లో కాలుష్యానికి సంబంధించిన సమాచారం సేకరించి అందించడం వల్ల ప్రభుత్వాలు, ప్రజలకు ఈ విషయం తెలుస్తుందని, కాలుష్య నివారణ చర్యలు తీసుకునేందుకు అవకాశం ఉంటుందని గూగుల్ వెల్లడించింది.
