అరెరె... ఇది భళే తమాషాగా ఉంది. తమాషానే ఆ రోబోలు నిజంగా పెళ్ళి చేసుకున్నాయి. వధువు రోబో సిగ్గుతో తల వంచుకుంటే వరుడు రోబో టీవీగా వధువు రోబో మెడలో తాళి కట్టింది. వీరిద్దరికి వివాహం జరిపించిన పురోహితుడు ఎవరబ్బా అనేగా మీ అనుమానం... అది రోబోనే. ఇంతకీ ఈ రోబోల పెళ్ళి తంతు జరిగింది ఎక్కడో..? రండి తెలుసుకుందాం..
జపాన్ లో రోబోల వివాహం జరిగింది. రెండు రోబో తయారీ కంపెనీలు వాటికి పెళ్లి చేసి ప్రచారం పొందాలని నిర్ణయించాయి. ఇక అంతే, 'మయవా డేంకీ' కంపెనీ రూపొందించిన 'ఫ్రోయీన్' రోబో వరుడుకి 'టకయుకి టోడో' కంపెనీ రూపొందించిన హ్యూమనాయిడ్ రోబో 'యుకిరిన్' అనే వధవును ఇఛ్చి పెళ్లి చేయాలని నిర్ణయించారు.
రెండు కంపెనీల ప్రతినిధుల సమక్షంలో అచ్చం పెళ్లి కుమార్తెగా తెల్లని గౌనులో వచ్చిన 'యుకిరిన్'ను 'ఫ్రోయీన్' వివాహమాడాడు. వీరికి వివాహం జరిపించిన 'పెప్పర్' కూడా రోబో. వివాహానంతరం కేక్ కట్ చేసిన అతిథులను రోబో బ్యాచ్ వీనులవిందు చేసింది. చివరకు ఆర్కెస్ట్రా కూడా రోబోలే చేశాయి.
మన జీవితాల్లో ఇక రోబో పెళ్ళి కొడుకులు, పెళ్లి కూతుళ్ళు రావడానికి టైం పట్టవచ్చు. కానీ ఈ కార్యక్రమాన్ని అనుసరించి రోబో పురోహితులు, ఆర్కెస్ట్రాలు రావడానికి ఎంతో సమయం లేదని ఇట్టే అర్థమై పోతోంది.
