భారత్, ఆస్ట్రేలియా దేశాల మధ్య గత ఎనిమిది సంవత్సరాలుగా జరుగుతున్న చర్చలు ఎట్టకేలకు ఫలించాయి. ఫలితంగా భారత్కు యురేనియం సరఫరాకు కాన్‌బెర్రా పాలకులు సమ్మతం తెలిపారు. భారత్ - ఆస్ట్రేలియా అణు సహకార ఒప్పందంలో భాగంగానే ఈ చర్చలు విజయవంతమయ్యాయి. ఫలితంగా ఆస్ట్రేలియా- ఇండియా అణు సహకార ఒప్పందం తక్షణమే అమలులోకి వస్తుందని ఆస్ట్రేలియా విదేశాంగ మంత్రి జూలీ బిషప్ ప్రకటించారు.
ఈ ఒప్పందం ప్రకారం ఆస్ట్రేలియన్ కంపెనీలు భారత్ తో యురేనియం వ్యాపారం నిర్వహించుకోవడానికి వీలవుతుంది. భారత్ లో పెరుగుతున్న విద్యుత్ అవసరాల మేరకు విద్యుత్ ఉత్పత్తికి ఈ ఒప్పందం ఎంతగానో దోహదం చేయనుంది. భారత్ కు యురేనియం సరఫరా చేయడానికి గతంలో కూడా ఆస్ట్రేలియా సుముఖంగా ఉన్నప్పటికీ న్యూక్లియర్ అణు నిరాయుధాకరణ ఒప్పందంపై సంతకం చేయడానికి భారత్ నిరాకరించడం, ఆస్ట్రేలియాలో ప్రభుత్వాలు మారడం లాంటి అంశాలు ఈ ఆలస్యానికి కారణమయ్యాయి.
