అమెరికాలో ఓ విచిత్ర సంఘటన చోటు చేసుకుంది. తన భుజానికి తగిలించుకునివున్న హ్యాండ్ బ్యాగ్‌ను బలవంతంగా లాక్కొని వెళుతున్న దొంగను పట్టుకునేందుకు పరుగెత్తిన ఓ నిండు గర్భిణి రోడ్డుపైనే పండంటి బిడ్డకు జన్మనిచ్చింది. బిడ్డకు జన్మనిచ్చే క్రమంలో ఆమె పెట్టిన కేకలు స్థానికుల్లో కదలిక తెచ్చి.. దొంగను పట్టుకునేలా చేశాయి.
అమెరికాలోని మిచిగాన్ రాష్ట్రంలో సినీ ఫక్కీలో జరిగిన ఈ సంఘటన వివరాలను పరిశీలిస్తే ఇటీవల మిచిగాన్ రాష్ట్రంలోని ఫ్లింట్ సిటీలో నిండు గర్భిణీ అయిన ఓ మహిళ సూపర్ మార్కెట్లో సరుకులు కొన్నుక్కుని... కార్లో వాటిని పెడుతుండగా... ఓ అగంతుకుడు ఆమె భుజానికి తగిలించుకున్న బ్యాగ్‌ను కాజేసి ఉడాయించబోయాడు. వెంటనే తేరుకున్న ఆమె పరుగు పెట్టి అతన్ని పట్టుకోబోయింది. దీంతో దొంగ ఆమెను బలంగా నెట్టివేసి దౌడు తీశాడు. ఈ హఠాత్ పరిణామంతో, ఆమె గట్టిగా గావు కేకలు వేయడం ప్రారంభించింది. అదేసమయంలో, ఆమెకు నొప్పులు రావడం... డెలివరీ అవడం నిమిషాల్లో జరిగిపోయాయి.
మహిళ అరుపులు విన్న స్థానికులు దొంగను పట్టుకున్నారు. నార్మల్ డెలివరీ అవడంతో పాటు... సిజేరియన్ చేయించుకునే కష్టం తప్పడంతో ఆమె సంతోషం వ్యక్తం చేసింది. దీంతో పాటు, చేజారిపోయిందనుకున్న పర్స్ మళ్లీ చేతికి అందడం మరింత సంతోషాన్నిస్తోందని చెప్పింది. దొంగను స్థానికులు పోలీసులకి అప్పజెప్పారు. అతనిని 'మార్క్ న్యూటన్'గా పోలీసులు గుర్తించారు. దీనిపై కేసు నమోదు చేసి దర్యాప్తు చేస్తున్నారు.
