ఫుకుషిమా అణు ప్లాంట్‌ను సందర్శించనున్న బాన్‌కీ మూన్

జపాన్‌లోని భూకంపం, సునామీ బాధిత ప్రాంతాల్లో ఐక్యరాజ్య సమితి ప్రధాన కార్యదర్శి బాన్ కీ మూన్ వచ్చే శనివారం నుంచి పర్యటించనున్నారు. గత మార్చి 11వ తేదీన జపాన్‌ను భారీ భూకంపం కుదిపేసిన విషయం తెల్సిందే. ఆ తర్వాత సునామీ సంభవించడంతో వేలాది మంది ప్రజలు చనిపోగా.. లక్షలాది మంది ప్రజలు నిరాశ్రయులయ్యారు.

ఈ భూకంపం కారణంగా ఫుకుషిమా డైచీ అణు విద్యుత్ కర్మాగారం కూడా దెబ్బతింది. దీంతో ప్లాంట్‌లోని రియాక్టర్ నుంచి అణుథార్మకత విడుదలైంది. ఈ నిషేధిత ప్రాంతాన్ని బాన్ కీ మూన్ సందర్శించనున్నారు. దీనికి టోక్యో ఎలక్ట్రికల్ పవర్ కార్పొరేషన్ వ్యతిరేకత తెలిపినప్పటికీ ఆయన ససేమీరా అంటున్నారు. ఖచ్చితంగా ఆ విద్యుత్ కర్మాగారాన్ని సందర్శించాలనే పట్టుదలతో ఉన్నారు. కాగా, మూన్ జపాన్ పర్యటన వచ్చే శనివారం నుంచి ప్రారంభంకానుంది.

అక్కడ నుంచి ఫుకుషిమా నగరంలోని ఒక ఉన్నత పాఠశాల విద్యార్థులతో మాట్లాడతారని ఆయన ప్రతినిధి వెల్లడించారు. అనంతరం జపాన్ రాజదాని టోక్యోలో ఆ దేశ ప్రధాని నావుటో కాన్‌, విదేశాంగ మంత్రి టకేకీ మట్సుమోటోతో సమావేశమవుతారు.