సచిన్ విషయంలో పొరపాటు చేశాను: నోరు విప్పిన ఛాపెల్
మాస్టర్ బ్లాస్టర్ సచిన్ టెండూల్కర్ విషయంలో పొరపాటు చేశానని ఎట్టకేలకు గ్రెగ్ ఛాపెల్ ఒప్పుకున్నాడు. ప్రపంచకప్‌లో సచిన్‌ను మిడిలార్డర్‌లో ఆడించాలని భావించాను. కానీ సచిన్ ఓపెనింగ్ స్థానాన్ని వదులుకోవడానికి ఇష్టపడలేదు. కాబట్టి సచిన్ విషయంలో భిన్నంగా వ్యవహరించి ఉండాలని నాలుగేళ్ల తర్వాత ఛాపెల్ అంగీకరించాడు. ఏ స్థానంలో దిగాలనే విషయాన్ని సచిన్‌కే వదిలేయాల్సిందని ప్రస్తుత ఆసీస్ సెలక్టర్ గ్రెగ్ ఛాపెల్ వ్యాఖ్యానించాడు. భారత క్రికెట్ జట్టుకు కోచ్‌గా ఉన్నంతకాలం వివాదాలు సృష్టించిన ఛాపెల్ చివరికి రాజీనామా చేశాడు. అసలు గొడవకు కారణమేమిటనే విషయంపై ఛాపెల్ నాలుగేళ్ల తర్వాత నోరువిప్పాడు. గౌతం భట్టాచార్య రచించిన పుస్తకంలో మొత్తం గొడవ గురించి గుర్తు చేసుకున్నాడు. సచిన్‌తో బ్యాటింగ్ ఆర్డర్ విషయంలో విభేదించాం. కానీ తానెప్పడు సచిన్ సామర్థ్యాన్ని శంకించలేదు. తర్వాత కొన్ని రోజుల్లోనే తానూ, సచిన్ మనస్పర్ధలను తొలగించుకున్నామని ఛాపెల్ వెల్లడించాడు.
