అంతర్జాతీయ క్రికెట్‌కు ఆస్ట్రేలియా స్పీడ్ స్టర్ మిచెల్ జాన్సన్ వీడ్కోలు పలుకుతున్నట్లు ప్రకటించాడు. సంప్రదాయ టెస్టుతో పాటు వన్డే, ట్వంటీ-20 అన్ని ఫార్మాట్ల నుంచి ఒకేసారి రిటైర్ అవుతున్నట్లు పేర్కొన్నాడు.
కివీస్‌తో జరుగుతున్న రెండో టెస్టుతోనే తన కెరీర్ ముగిసినట్లు ప్రకటించాడు. 34 ఏళ్ల వయసున్న మిచెల్ జాన్సన్ సుదీర్ఘకాలం పాటు ఆస్ట్రేలియా బౌలింగ్‌కు వెన్నెముకలా నిలిచాడు.
టెస్టుల్లో 311 వికెట్లు నేలకూల్చిన మిచెల్ జాన్సన్, టెస్టుల్లో అత్యధిక సంఖ్యలో వికెట్లు పడగొట్టిన నాలుగో బౌలర్‌గా రికార్డులకెక్కాడు. క్రికెట్ మైదానంలో ఎప్పుడూ పచ్చబొట్లతో దర్శనమిచ్చే ఈ క్రికెటర్‌ తాను వీడ్కోలు పలికేందుకు ఇదే సరైన సమయమని భావిస్తున్నట్లు అభిప్రాయం వ్యక్తం చేశాడు.
