చంద్రుడిని ముద్దాడిన త్రివర్ణ పతాకం

శుక్రవారం.. భారత కాలమానం ప్రకారం సరిగ్గా రాత్రి 8.31 నిమిషాలు. భారత అంతరిక్ష ప్రయోగ చరిత్రలో నిరుపమాన ఘట్టం.. చంద్రుడిపై మువ్వన్నెల పతాకం జాబిలిని ముద్దాడింది. అక్టోబర్ 22న చంద్రుడిపైకి భారత అంతరిక్ష పరిశోధనా సంస్థ ఇస్రో ప్రయోగించిన చంద్రయాన్-1 నౌక లక్షలాది కిలోమీటర్ల సుదీర్ఘ ప్రయాణాన్ని విజయవంతంగా ముగించి కక్ష్యలన్నీ దాటి ఈ శుభరాత్రి వేళ చందమామపైకి నిర్మలంగా అడుగు పెట్టింది.

అంతరిక్షంలో భూమికి అత్యంత చేరువగా ఉన్న జాబిలి దక్షిణ ధ్రువంపై మూన్ ఇంపాక్ట్ ప్రోబ్ -ఎంఐపి- విజయవంతంగా దిగిన చారిత్రక క్షణాలు భారత జాతిని పరవశింపజేశాయి. ఈ మహత్తర ఘట్టం ఆవిష్కరణతో చంద్రుడి ఉపరితలాన్ని స్పర్శించిన నాలుగో దేశంగా భారత్ చరిత్రకెక్కింది.

చంద్రయాన పతాకం..

లక్షలాది కిలోమీటర్ల సుదీర్ఘ ప్రయాణాన్ని విజయవంతంగా ముగించి కక్ష్యలన్నీ దాటి చందమామపైకి అడుగు పెట్టిన చంద్రయాన్-1 నౌకలోని ఎంఐపి పేలోడ్ భారతీయ త్రివర్ణ పతాకాన్ని చంద్ర ఉపరితలంపై సుతారంగా హత్తింది. భారతీయ సాంకేతికాభివృద్ధికి ఇది మంగళ నీరాజనం...

భారత కీర్తిని విశ్వవ్యాప్తంగా చాటిన ఓ మహత్తర ఘట్టానికి ఈ శుక్రవారం రాత్రి చందమామ వేదికగా నిలిచింది. చంద్రయాన్ నౌక నుంచి ఎంఐపీ రోబో విజయవంతంగా వేరుపడి చంద్రుడి ఉపరితలంపైకి చేరింది. ఈ రోబోకు ఇరువైపుల త్రివర్ణ పతాకం అమర్చారు. రోబోపై సంస్కృత శ్లోకాన్ని లిఖించారు. ఈ ప్రక్రియలో మొదట మువ్వన్నెల పతాకం చంద్రుడి ఉపరితలాన్ని ముద్దాడింది.

ఈ రోబోలో అమర్చిన వీడియో చంద్రుడిపై సమాచారాన్ని ఇస్రోకు చేరవేస్తుంది. రోబోలోని సాంకేతిక పరికరాలు చంద్రుడిపై వాతావరణ పరిస్థితులను అంచనా వేసి ఇస్లోకు చేరవేస్తుంది. దీనితో చంద్రుని స్థితిగతులు అర్థం చేసుకుని భవిష్యత్ ప్రయోగాలకు ఈ ప్రయోగం మార్గదర్శనం చేస్తుంది.

చంద్రుని ఉపరితలంపై దిగి 20 నిముషాలపాటు ఉండే ఈ ఎంఐపి రోబో చంద్రుని ఉపరితలాన్ని ఫోటోలు తీసి భూమికి చేరవేస్తుంది. చంద్రుడిపై భారతీయ మొట్టమొదటి మానవరహిత ఉపగ్రహ మిషన్ అయిన చంద్రయాన్-1లో ఉంచిన 11 పేలోడ్‌లలో ఎంఐపి ఒకటి. చంద్రయాన్-1 గురువారం తన చిట్ట చివరి చంద్ర కక్ష్యను చేరుకుంది. చంద్రుడి ఉపరితరానికి వంద కిలోమీటర్ల దూరంలో చంద్రయాన్‌ను నిలబెట్టడంలో ఇస్రో శాస్త్రజ్ఞులు అపూర్వ విజయం సాధించారు.