యాపిల్ మాజీ సీఈఓ స్టీవ్ జాబ్స్ మృతిపై విచారం వ్యక్తం చేసిన అమెరికా అధ్యక్షుడు బరాక్ ఒబామా ప్రపంచం ఒక దార్శకుణ్ణి కోల్పోయిందన్నారు. అమెరికా అత్యంత గొప్ప ఆవిష్కర్తల్లో జాబ్స్ ఒకరని ఒబామా పేర్కొన్నారు.
"ప్రపంచం ఒక దార్శకుడిని కోల్పోయింది. వివిధ ఆవిష్కరణల ద్వారా స్టీవ్ సాధించిన విజయాలను నుంచి నేర్చుకోవడం కంటే ఆయనకు అర్పించే గొప్ప నివాళులు లేవు" అని జాబ్స్ మృతిచెందిన అనంతరం ఒబామా ఒక ప్రకటనలో తెలిపారు.
"స్టీవ్ జాబ్స్ మరణవార్త విని మిఛెల్, నేను తీవ్రంగా విచారించాం. అమెరికా గొప్ప ఆవిష్కర్తల్లో స్టీవ్ ఒకరు. విభిన్నంగా ఆలోచించే ధైర్యం వున్న స్టీవ్ ప్రపంచ గతిని మార్చగలనని నమ్మారు. అందుకనుగుణంగా తన ప్రతిభను ప్రదర్శించారు" అని ఒబామా చెప్పారు. ఒక గ్యారేజ్‌లో ఏర్పాటు చేసిన కంపెనీని భూమండలంలో అత్యంత విజయవంతమైన కంపెనీల సరసన చేర్చిన జాబ్స్ అంకితభావాన్ని ఒబామా కొనియాడారు.
