దేశీయ కార్ల నిర్మాణ రంగంలో అగ్రగామిగానున్న మారుతి సుజుకీ సంస్థ ప్రస్తుత ఆర్థిక సంవత్సరం చివరి నాటికి కొత్త మోడల్ ఆల్టో, వాగన్ ఆర్‌లను దేశీయ ఆటో మోటార్ మార్కెట్లో విడుదల చేసేందుకు సన్నహాలు చేస్తోంది.
కొత్త ఆల్టో కారులో 1 లీటరు సామర్థ్యం గల కె- సిరీస్ ఇంజన్ను, వాగన్ ఆర్‌కు 1.2 లీటర్ల కె- సిరీస్ ఇంజన్ను అమర్చనున్నట్టు మారుతి కంపెనీ ప్రకటించింది. ఈ రెండు కార్ల డిజైన్లను మార్చనున్నట్టు కంపెనీ ఒక ప్రకటనలో తెలిపింది. కాగా మారుతి స్విఫ్ట్‌కు మార్చి నుంచి 1.2 లీటర్ల సామర్థ్యం కలిగిన పెట్రోలు ఇంజన్ను అమర్చనున్నట్టు ఆ ప్రకటనలో వెల్లడించింది.
కొత్త ఆల్టోతో టాటా మోటార్స్‌కు చెందిన నానో కారుకు పోటీ ఇవ్వాలని మారుతి సుజుకి సిద్ధమవుతోంది. 2011 నాటికి నానోకు పోటీగా కొత్త ఆల్టోను రూ 1.4 లక్షల నుంచి రూ 2 లక్షల మధ్య ధరకు మార్కెట్లో తన వినియోదారులకు అందజేసేందుకు మారుతి కంపెనీ ప్రణాళికలు సిద్ధం చేస్తోందని మారుతి సంస్థ ఆ ప్రకటనలో వివరించింది.
