సాధారణంగా చలికాలంలో చర్మంతోపాటు పెదాల ఆరోగ్యానికి కూడా ప్రత్యేక శ్రద్ధ తీసుకుంటారు. ముఖ్యంగా మహిళలు ఈ విషయంలో ప్రత్యేకమైన శ్రద్ధ తీసుకుంటారు. ఇలాంటి వారికోసం అందమైన అధరాల కోసం ఈ చిట్కాలు పాటించడం వల్ల పెదాల ఆరోగ్యంతోపాటు అందాన్నీ కాపాడుకోవచ్చు. అవేంటో చూద్ధాం.
కొద్దిగా తేనెలో రోజ్‌వాటర్‌ లేదా నానబెట్టిన గులాబీ రెబ్బల పేస్టు కలిపి మిశ్రమాన్ని తయారు చేసుకోవాలి. దీన్ని రోజుకి రెండుసార్లు చొప్పున పెదాలకు రాసుకొని 10 నిమిషాల తరువాత కడిగేయాలి. ఇలా చేయడం వల్ల పెదాలకు ఎర్రటి రంగు వస్తుంది.
ఒక చెంచాడు పసుపును పాలతో ముద్దగా చేయాలి. ఈ మిశ్రమాన్ని పెదాలకు రాసుకొని 5 నిమిషాల తర్వాత కడిగేసి లిప్‌బామ్‌ రాసుకోవాలి. ఇలా వారానికి రెండుసార్లు చేయడం వల్ల నలుపు పోయి పెదాలు అందంగా కనిపిస్తాయి.
చక్కెరలో కొద్దిగా నిమ్మరసం కలిపి స్క్రబ్‌ తయారు చేయాలి. దీనితో పెదాలను కొద్దిసేపు రుద్దాలి. ఈ విధంగా రెండు రోజులకొకసారి చేస్తే పెదవులు ఆకర్షణీయంగా కనిపిస్తాయి.
క్యారెట్‌ లేదా బీట్‌రూట్‌ను పేస్టులా చేసి దానిలో రెండు టేబుల్‌ స్పూన్ల చొప్పున తేనె, ఆలివ్‌ ఆయిల్‌ కలపాలి. దీన్ని ప్రతి రోజూ ఉదయం, రాత్రి పెదాలకు రాసుకొని పావుగంట తర్వాత కడిగేసుకోవాలి. ఇలా చేయడం వల్ల పెదాలపై మృతకణాలు తొలగిపోయి, అందంగా కనిపిస్తాయి.
స్ట్రాబెర్రీలను మెత్తగా చేసి దానిలో కొద్దిగా పెట్రోలియం జెల్లీ కలపాలి. ఈ మిశ్రమం లిప్‌బామ్‌లా పనికొస్తుంది. దీన్ని పెదాలకు రాసుకోవడం వల్ల నలుపు రంగు పోయి అందంగా, మృదువుగా అవుతాయి.
