తెలంగాణాకు అడ్డువచ్చేవారిని అడ్డంగా నరకండి అని వ్యాఖ్యానించిన విజయశాంతి మాటలను తెలంగాణా జాగృతి సమితి అధ్యక్షురాలు కవిత సమర్థించుకున్నారు. తాము ఏం అనుకుంటామో అదే మాట్లాడతామన్నారు. తెలంగాణా బిడ్డలు మనసులో ఒక మాట, పైకి ఒక మాట రాదనీ, అనుకున్నదేదో బయటకు అనేస్తామని ఆమె విజయశాంతిని వెనకేసుకొచ్చారు.
ఓ ప్రైవేట్ టెలివిజన్ ఛానల్ అడిగిన ప్రశ్నకు బదులిస్తూ ఆమె... "మాకు ఎన్నికల కండక్ట్ కోడ్ ఉన్నపుడు ఒకలాగ, లేనపుడు మరోలా మాట్లాడటం చేతకాదు. తెలంగాణా వాదులు మాట్లాడలనుకున్న నిజాల్ని నిర్భయంగా మాట్లాడుతారు" అని అన్నారు.
అంతే కాకుండా ఆంధ్రా ప్రభుత్వం, ఆంధ్రా పోలీసులు కాబట్టి ఒక తెలంగాణ ఆడబిడ్డను, ఎంపీ అని కూడా చూడకుండా అరెస్టు చేయడానికి వచ్చారు. ఇది ఎంత వరకూ న్యాయమని ప్రభుత్వాన్ని ప్రశ్నించారు. ఇది తెలంగాణ వాదాన్ని అడ్డుకోవడానికి చేసే కుట్రగా ఆమె పేర్కొన్నారు.
